Heitt rúllubrauð

Þetta var alltaf uppáhalds rétturinn minn í öllum fermingum. Mjög auðvelt að veganvæna hann, mæli með!

Innihald:

1 Rúllutertubrauð / hægt að nota gróft eða fínt
2 dl + 2 msk af vegan majónesi
3 msk af Oatly rjómaosti (hreinum, blá dós)
1 sveppateningur frá Knorr
6 sveppir
1/2 rauð paprika
1 dl af söxuðum púrrlauk
Hálf dós (ca 210 gr) af niðursoðnum aspas
Paprikuduft
Hvítlauksduft
Season All krydd
Olía

Aðferð:
1. Hita ofninn á 200 gráður og taka rúllutertubrauðið út úr frystinum.

2. Skera sveppina smátt og saxa smátt paprikuna og púrlaukinn. Steikja það saman á pönnu með smá olíu. Krydda með papriku- og hvítlauksdufti.

3. Þegar grænmetið á pönnunni er orðið mjúkt og græja ég pott með majónesinu, rjómaostinum, sveppakraftinum (saxaður) og set 1 msk af olíu.

4. Ég hæri þessu saman í pottinum á meðalháum hita þangað til að sveppakrafturinn hefur bráðnað ásamt rjómaostinum. Þegar að það eru engir kekkir lengur í sósunni bæti ég grænmetinu af pönnunni út í pottinn.

6. Síðan bæti ég líka við aspasinum ásamt 1 msk af safanum úr aspasdósinni og krydda með smá season all og paprikudufti.

7. Hræri þessu vel saman í pottinum og leyfi að malla í 2-3 mínútur á lágum hita.

8. Svo smyr ég þessari fyllingu inn í rúllubrauðið, passa að smyrja vel yfir allt brauðið- líka út í enda. Ég mæli svo með því að nota plastið sem fylgir með til að rúlla brauðinu saman aftur. Annars getur það rifnað.

9. Svo rúlla ég brauðinu og kem því fyrir á bökunarplötu.

10. Ég smyr síðan 2 msk af majónesi ofan á rúllubrauðið ásamt því að krydda ofan á með smá paprikukryddi.

11. Brauðið fer svo inn í ofn og bakast í 15-20 mínútur. Brauðið er tilbúið þegar að það byrjar að gyllast.

Njótið!