Ég elska fahítas. Þessi uppskrift og samsetning er með áhrifum frá Mexíkó.
​Alvöru tex mex stemming, namm!

---

(Fyrir ca 3-4 manns)

Innihald:

• Fahítas pönnuköku pakki (glúteinlausar td. frá Schar eða Old el Paso - fæst td. í Krónunni)
• 1  Vegan hakk (Ég nota frá Anamma - það er glúteinlaust)
• Guacamóle
• 2/3  Kúrbítur
• Vorlaukur
• 1 og 1/2 paprika
• 1/2 Rauðlaukur
• Hvítlauksrif
• Klettakál
• Sítrónusafi
• Vegan sýrður rjómi frá Oatly (Þessi í svörtu dollunni)
• Salsa sósa
• Sriracha mayo sauce  (fæst í t.d. í Krónunni)
• Snakk (t.d. salted flakes frá Old El Paso þær eru glúteinlausar)
• Salt og pipar
• Gott "kjöt" krydd fyrir hakkið
• Olía

Muna að taka hakkið úr frysti fyrst.
Þá byrja ég á því að blanda saman í guacamóleið en uppskriftin af því er hér. Set það síðan í kæli á meðan ég græja hitt.
Því næst byrja ég á því að steikja grænmetið saman. Ég sker kúrbítinn, rauðlaukinn, vorlaukinn, paprikuna, hvítlauksrifið og blanda því saman á pönnu með olíu, passa að krydda með salti og pipar. Steiki þar til að grænmetið er orðið gyllt og þá skelli ég því í eldfast mót og hendi inn í ofn á lágan hita til að halda því heitu á meðan ég græja hakkið. Það er hægt að nota hvaða grænmeti sem er í fyllinguna. ​

Þá tek ég hakkið og set á pönnu. Ég steiki það uppúr olíu og set hvaða krydd sem er ásamt salt og pipar. Mér finnst oft gott að nota eitthvað "kjöt krydd" sem er með smá svona season-all feelingi. Muna bara að skoða innihaldið, stundum er settur ostur í krydd. 
Ég steiki hakkið  þar til það er orðið brúnna og tilbúið, ca 7-10 mín.
Þá set ég klettakálið í sér skál og blanda því með smá sítrónusafa og salti. 

Þegar allt þetta er tilbúið raða ég í fahítasið. 
Ég set guacamóle, hakk og grænmetið fyrst. Síðan salsasósu, sýrðan rjóma, klettakál og snakk.
​Ég toppa þetta síðan með sriracha mayo sauce.

Tips: Ef þið eruð mjög svöng og viljið meiri fyllingu í fahítasið er gott að bæta við hrísgrjónum.

​Njótið!